TIRELO YA POLELO YA BOSETŠHABA
Tirelo ya Polelo ya Setšhaba e godiša le go nolofatša kgokaganyo ya polelo go ralala dipolelo. Go latelela dinyakwa tša Molaotheo tša polelo, Tirelo ya Polelo ya Setšhaba e laola phapano ya polelo tša setšhaba sa rena gape e rwele maikarabelo a go beakanya dipolelo kamoka tša batho ba rena ka go diragatša magato a molaotshepetšo ao a ikemišeditšego go godiša tšhomišo ya dipolelo tše, gape le dipolelo tša go ba le histori ya go beelwa ka thoko.
Kgwebo ya theo ya NLS ke go kgotsofatša dinyakwa tša polelo tša Molaotheo ka go nolofatša, go godiša le go fa tirelo ya phetolelo le thulaganyo ka dipolelo kamoka tša semmušo le ka go laola phaphano ya dipolelo ka peakanyo ya polelo le diprotšeke tša mareo.
NLS e šoma bjalo ka tshepetšo ya thekgo ya mmušo ka go fetolela ditokomane tša semmušo ka go dipolelo kamoka tša semmušo. Tirelo ya yona ya mareo e thuša ka tšwetšopele le mpšhafatšo ya tlotlontšu ya dipolelo kamoka tša semmušo. Mediro ya peakanyo ya polelo e tsenya tšwetšopele ya molaotshepetšo wa polelo le mekgwa ya go o diragatša.
PEAKANYO YA POLELO
Tsepelelo ye kgolo ya Sekabolaodi bja Peakanyo ya Polelo ya Tirelo ya Polelo ya Setšhaba (NLS) ke tšwetšopele ya dipolelo tše dintši le kgodišo ya hlompho ya dipolelo kamoka tša Afrika Borwa. Ka ge Peakanyo ya Polelo ka Afrika Borwa e direga ka gare ga phetogo ya maemo a leago, tšwetšopele ya dipolelo tša go ba le histori ya go beelwa thoko e hlokomelwa kudu.
Mediro megolo ya sekabolaodi e tsenya yeo e latelago:
Tšwetšopele ya molaotshepetšo wa polelo ka go dira maano, mekgwa le ditiro le didirišwa tša gore e phethege ka nnete.
Phethagatšo ya molaotshepetšo wa polelo ka go o (i) fa bokgonthe le taolo le (ii) hlohleletšo ya tšhomišo ya dipolelo tša Afrika Borwa.
Tshekatsheko ya phethagatšo ya molaotshepetšo go phetha kgontšhago ya molaotshepetšo.
Sekabolaodi bja Peakanyo ya Polelo bo hlomilwe ka Agostose 1993 go eletša mmušo ka tšwetšopele le phethagatšo ya molaotshepetšo ka merero ya polelo go ya ka karolo ya bo 6 ya Molaotheo. Go se fihle selo le bokgathatema ka botlalo ka go ditshepetšo tše di ile tša gatelelwa. Modiro mogolo wa pele wa sekabolaodi e be e le go laola tshepetšo ye thata ya go hloma Lekgotla la Dipoelo Kamoka tša Afrika Borwa. Tshepetšo e thomile ka 1994 ka khonferense yeo e ilego ya swarwa go kwa maikutlo a batho, Dipolelo tša Dikhonferense Kamoka (Language for All Conferences), ya latelwa ke ditheeletšo tša go latelelana tšeo di ilego tša swarwa nageng ka bophara gomme tša dira gore go be le Molaokakanywa wa Lekgotla la Dipolelo Kamoka tša Afrika Borwa ka 1995. Lekgotla la dipolelo kamoka tša Afrika Borwa le hlomilwe ka 1996. Tše dingwe tša diprotšeke tšeo sekabolaodi se di dirago ke:
Molaotshepetšo le Peakanyo ya Polelo tša Afrika Borwa
Tšwetšopele ya Molaotshepetšo le Peakanyo tša Afrika Borwa di thomile ka 1995 ka go kgethwa ka Sehlopha sa Sepane sa Mošomo sa Polelo (LANGTAG) go eletša Letona la Bokgabo, Setšo, Saense le Theknolotši ka molaotshepetšo wa polelo. Morago ga ditherišano tše nabilego nageng kamoka, pego ya LANGTAG e ile ya rerwa ka go khonferese ye kgolo kudu ka di 29 tša June 1996 pele ga ge sengwalwa sa bofelelo se tlhagišwa ka Agostose 1996.
Molaotshepetšo le Peakanyo tša go akanywa tša Afrika Borwa tšeo di theilwego go ditšhišinyo tša Langtag di ile tša lokišwa morago ga ditherišano tše dingwe le dinyakišišo. Ka Disemere 1999 Letona le ile la kgetha phanele ya go eletša go lokiša sengwalwa sa mafelelo seo se ilego sa bontšhwa bakgathatema ka go Indaba ya Polelo ka Matšhe 2000. Go tšwa go diswayaswayo tša bakgathatema go Indaba, phanele ya Keletšo e ile ya boeletša Molaotshepetšo le Peakanyo tša Afrika Borwa.
Molaotshepetšo kakanywa wa Afrika Borwa o ile wa tlhagišwa pele ga Komiti ya Kabinete ya Lekala la Leago ka di 13 tša Setemere 2000. Komiti e ile ya šišinya gore tokomane ya poledišano ye nngwe ka morero e tlišwe, go tšeelwa hlogong ditlapele tša naga le dithulano tša tšhelete ka bophara.
Go latelela ditšhišinyo tše go ile gwa dirwa tshekatsheko ya botlalo ka go dikgoro tša mmušo tša bosetšhaba le diprofense go phetha maemo a infrastraktšha ya polelo yeo e lego gona. Go dirwa kakanyo ya ditshenyegelo ya molaotshepetšo woo o šišintšwego mmogo le Matlotlo a Setšhaba.
TISSA (Tirelo ya go Toloka ka Mogala ya Afrika Borwa)
Protšeke ye ke ye nngwe ya mekgwa ya phethagatšo ya molaotshepetšo woo o šišintšwego. Mapheko a polelo a sa ganetša Maafrika Borwa, kudukudu baboledi ba dipolelo tša Afrika, khumano yeo e lekanago ya ditirelo tša mmušo. Tirelo ya Phetolelo ka mogala ka Afrika Borwa e ka no dira gore go kgonege gore motho yo mongwe le yo mongwe a boledišane le balaodi ka polelo ya gagwe, mohlala, mafelong a go swana le dipetlele, ditiši tša maphodisa le dikantoro tša mmušo. Go lebeletšwe tirelo ya teko ya 2000/2001 mafelong ao a kgethilwego diiri tše 12 ka letšatši, go tloga ka 07:00 go fihla ka 19:00, matšatši a tshelela ka beke.
Ditheknolotši tša Polelo ya Batho (HLT)
Protšeke ye ke tšhomišano ya tšhimollo le PANSALB go nolofatša tšwetšopele le tšhomišo ya dipolelo tša Afrika Borwa. Peakanyo ya mokgwa wa legoro la HLT e a hlokega go tsepelela maiteko a nyakišišo ya setšhaba le go aga bokgoni go dipolelo kamoka tša Afrika Borwa. Go hlomilwe komiti ya tshepetšo go ngwala tokomane ya peakanyo yeo e tla fago mekgwa ya phethagatšo ya go hlongwa ga intasteri ya HLT yeo e atlegilego gore go tšwetšwe pele dipolelo tša Afrika Borwa.
HOYOZELA ka baka la gore dipolelo tša rena ke tša rena kamoka
Ka 1998 lesolo la dipolelo ka bontši le ile la tsebagatšwa go-
lemoša batho ka bohlokwa bja polelo ka setšhabeng sa rena;
netefatša gore badudi kamoka ba kwešiša ditokelo tša bona tša molaotheo mabapi le polelo; le godiša dipolelo ka bontši gore Maafrika Borwa a bone dipolelo ka bontši e le mothopo wo bohlokwa.
Kgato ya pele ya lesolo e ile ya tsepelela Tirelo ya Setšhaba gomme Kgato ya Bobedi yona e ile ya leba setšhabeng ka bophara. Ditšweletšwa tša lesolo le e be e le dikhalentara tša dipolelo ka bontši, dipapetla, Bagwera ba polelo (Lingo Pals) (ba go ba le dikgato tša tumedišo ka dipolelo tše 11) le video, Polelo ya Mma (Mother Tongue), yeo e bego e šomišwa lebenkeleng la mošomo.UNESCO e ile ya ya go Tirelo ya Polelo ya Setšhaba gore e kgathe tema go tshekatsheko go kgoboketša tshedimošo ya pego ka dipoelo kamoka tša semmušo mmogo le Khoe, San le dipolelo tša Nama tša Afrika Borwa. Ka baka la gore go be go nyakega tsebo ya go tsenelela ya dipolelo tše, dipotšišo tša tshekatsheko di ile tša ntšhetšwa ntle go ditsebi tša polelo gore di fe tshedimošo.
Go ile gwa kgoboketšwa tshedimošo ye ntši ka dintlha tša go fapana ka dipolelo tša Afrika Borwa, go swana le tshedimošo ya thutafase, diphapano, palo ya diboledi tša polelo ye nngwe le ye nngwe, tshedimošo ya khudugo, ditiragalo tša ikonomi tša setšhaba se sengwe le se sengwe sa polelo, maikutlo ka polelo, mekgatlo ya go rwala maikarabelo a molaotshepetšo wa polelo le peakanyo mabapi le polelo ye nngwe le ye nngwe le ditšo tša dingwalwa.
Pego ya UNESCO ya Dipolelo tša Lefase e tla gatišwa ka 2001 gomme e tla fa katologano ya ditšhišinyo ka baka la poloko le kgodišo ya setšo sa polelo sa batho.
Didatapeisi tša merero ya polelo
Melaotshepetšo ya Polelo: dikgoro tša mmušo tša setšhaba (June 2001)
Dikantoro tša polelo ka go dikgoro tša mmušo tša setšhaba (June 2001)
Melaotshepetšo ya polelo: diprofense (June 2001)
Ditirelo tša Polelo tša Diprofense (June 2001)
Diinstithušene tša thuto kgolwane tšeo di rutago phetolelo le/goba botoloki (June 2001)
Dipalopalo SA
Dikgatišo
Go humana tshedimošo ye nngwe, hle ikopanye le:
Hlogo: Peakanyo ya Polelo
Mogala: 337 – 8366 Fekese 324 – 2119
